Bændasamtökin telja birgðir vera of miklar
Landbúnaðarráðherra leggur hins vegar áherslu á að fremur verði brugðist við vaxandi birgðasöfnun með söluátaki innanlands. Þá vísar landbúnaðarráðherra til þess að á næstu dögum muni hefjast viðræður um endurskoðun gildandi sauðfjársamnings þar sem m.a. fyrirkomulag útflutnings hljóti að koma til skoðunar.
Fyrsta sinn sem ráðherra fer ekki að tillögum bænda
Ari Teitsson, formaður Bændasamtakanna, segir að í samræmi við lög leggi samtökin fyrir ráðherra tillögu um útflutningshlutfall en það sé ráðherra að taka endanlega ákvörðun. "Þetta hefur gilt frá 1995, ef ég man rétt, og ráðherra hefur alltaf farið að tillögum Bændasamtakanna fyrr en nú í haust. Hver prósenta er líklega á bilinu 60 til 70 tonn þannig að ráðherra telur útflutningsþörfina vera um 200 tonnum minni en við."Ari segir bændur fá á bilinu 160 til 190 krónur fyrir lambakjöt til útflutnings en 250 til 300 á innanlandsmarkaði. "Tillaga okkar um 28% byggist á því að birgðir eru of miklar og það er dýrt að liggja með birgðir. Það eru einkum þrjár ástæður fyrir of miklum birgðum. Í fyrsta lagi er salan aðeins minni en við reiknuðum með, í öðru lagi erum við enn með birgðir sem mynduðust vegna of lágs útflutningshlutfalls á árinu 2000 og í þriðja lagi átti Kjötumboðið að flytja út 170 tonn sem þeir ekki gerðu vegna gjaldþrots heldur seldu á innanlandsmarkaði. Við teljum óskynsamlegt að velta birgðum á undan okkur," segir Ari.
Aðspurður segist Ari reikna með að birgðir um mánaðamótin ágúst-september í ár séu um 700 til 800 tonn en hæfilegar birgðir að mati þeirra sem slátra og selja séu einhvers staðar í kringum 400 tonn.
"Það má alltaf gera betur í sölumálum en það er mjög hörð samkeppni á markaðnum. Það hefur verið mikið framboð á svínakjöti á lágu verði og síðan er framboð á kjúklingum að aukast aftur og við sjáum það fyrir okkur að kjötmarkaðurinn verði mjög mettaður á næstu mánuðum. Það er staðreynd sem blasir við en það breytir ekki því að það þarf að halda lambakjötinu fram."
