Fjölmenni var í Þjóðleikhúsinu í dag á stofnfundi Regnbogabarna fjöldasamtaka áhugafólks um eineltismál. Á fundinum flutti Ólafur Ragnar Grímsson, forseti Íslands, ávarp. Söngkonurnar Selma Björnsdóttir og Jóhanna Vigdís Arnardóttir sungu við undirleik Kjartans Valdimarssonar og Stefán Karl Stefánsson, leikari og áhugamaður um baráttu gegn einelti flutti brýningarræðu. Fundarstjóri var Pálmi Gestsson.

Í ávarpi sínu sagði Ólafur Ragnar Grímsson meðal annars að nauðsynlegt sé að þjóðin horfi í augun á sjálfri sér og játi að eitthvað ami að samfélaginu, þegar ungmenni kikni undan álagi eineltis og taki sín eigin líf. Ólafur hvatti landsmenn til að fylkja sér gegn einelti að baki Stefáni Karli með því að skrá sig í samtökin. Ólafur Ragnar var meðal fyrstu fundarmanna til að gerast stofnfélagi í samtökunum.

Á fundinum var kosin undirbúningsstjórn Regnbogabarna. Í henni eiga sæti: Ellert Borgar Þorsteinsson skólastjóri, Eva María Jónsdóttir dagskrárgerðarkona, Jón Adólf Guðjónsson fv. bankastjóri, Ragnheiður Arngrímsdóttir flugmaður, Þorsteinn M. Jónsson forstjóri og Jón Páll Hallgrímsson ráðgjafi. Hin nýkjörna stjórn mun skipta með sér verkum og síðan skipuleggja starfsemina. Aðal styrktaraðilar Regnbogabarna eru Búnaðarbankinn og Vífilfell. Fjölmörg önnur fyrirtæki og einstaklingar hafa einnig á undanförnum dögum og vikum lofað að leggja samtökunum lið.  

Upphafið að stofnun Regnbogabarna má rekja til Stefáns Karls Stefánsonar leikara sem hefur reynslu af einelti sem þolandi, gerandi og áhorfandi. Barátta Stefáns hófst fyrir nokkrum árum þegar hann var fenginn til að ræða reynslu sína á fundi í grunnskóla. Síðan hefur hann verið á ferðinni og haldið fjölda fyrirlestra, rætt við foreldra og börn og komið að fjölmörgum eineltismálum og talað um einelti í fjölmiðlum.

Heimasíða Regnbogabarna