Sjúkraflutningamaðurinn sem á fimmtudag í síðustu viku var dæmdur í níu mánaða fangelsi fyrir kynferðislega áreitni gegn konu sem verið var að flytja á sjúkrahús hefur verið leystur frá störfum hjá Slökkviliði höfuðborgarsvæðisins. Maðurinn hefur alla tíð neitað sök og hefur ákveðið að áfrýja dómnum til Hæstaréttar.

Atvikið átti sér stað í ágúst í fyrra. Að sögn Jóns Viðars Matthíassonar varaslökkviliðsstjóra var maðurinn leystur frá störfum sem sjúkraflutninga- og slökkviliðsmaður í mars á þessu ári eftir að DNA-rannsókn leiddi í ljós að munnvatn úr manninum hafði fundist á öðru brjósti konunnar. Hann gegndi öðrum störfum hjá slökkviliðinu þar til hann var alfarið leystur frá störfum í fyrradag.

Stjórnendur slökkviliðsins boðuðu til starfsmannafundar vegna málsins í síðustu viku. Jón Viðar segir tilgang fundarins einfaldlega hafa verið þann að gera starfsmönnum grein fyrir málinu. Ekki hafi verið talið tilefni til sérstakra aðgerða enda noti slökkviliðið sömu aðferðir við sjúkraflutninga og víðast erlendis.