Á fundi landbúnaðarnefndar Alþingis á mánudag var farið yfir erfiða stöðu á kjötmarkaðinum en að óbreyttu stefnir í mikla umframframleiðslu á kindakjöti.

Drífa Hjartardóttir, formaður nefndarinnar, segir ljóst að miklar birgðir séu til af kindakjöti í landinu þar sem mikill samdráttur hafi orðið í sölu á því síðustu mánuðina. Það stefni í mikinn vanda vegna þessa þegar komi fram á næsta ár.

"Það er alveg ljóst að markaður fyrir kindakjöt hér innanlands hefur minnkað mikið. Ég tel að í raun hafi bændur verið hvattir til of mikillar framleiðslu miðað við þróun innanlandsmarkaðarins. Á sama tíma næst ekki nema lítið brot í útflutning. Það er lítils háttar aukning í útflutningnum en alls ekki nægjanlegt til þess að draga úr umframframleiðslu. Síðasti búvörusamningur var að mínu viti of framleiðsluhvetjandi og ég held að menn hafi verið of bjartsýnir á sölu á innanlandsmarkaði og eins á útflutning á kindakjöti."

Bóndinn fær lítið

Drífa bendir á að skilagjald til bænda í útflutningi sé svo lágt að í raun sé bóndinn lítið eða ekkert að fá fyrir vinnu sína. Útflutningurinn sé auk þess svo lítill að ekki sjái högg á vatni. Þá hafi offramleiðsla á svína- og kjúklingakjöti skekkt myndina enn frekar fyrir sauðfjárbændur. "Maður sér fram á að það stefni í hrun í greininni að óbreyttu og það yrði mjög sársaukafullt."

Drífa segir að landbúnaðarnefnd hafi miklar áhyggjur af stöðu mála; sjálf telji hún nauðsynlegt að taka á umframframleiðslu á kindakjöti fyrir næstu sláturtíð svo vandinn verði ekki óviðráðanlegur.