Umdæmisdómstóllinn í Dade-sýslu hafði áður fallist á lögbannskröfuna en síðastliðinn mánudag var tekið fyrir staðfestingarmál vegna hennar.

Í afriti af framburði fyrir dómnum, kemur fram að lögbannið byggðist á eiðsvarinni yfirlýsingu frá Jóhannesi Jónssyni. Yfirlýsingin er rituð á ensku en fyrir dómi sagðist Jóhannes ekki sjálfur geta lesið ensku. Hann staðfesti að hafa fengið dóttur sína til að lesa yfirlýsinguna yfir og hún hafi síðan ráðlagt honum að skrifa undir. Þegar þetta kom fram lýsti dómarinn því yfir að yfirlýsingin væri úr gildi fallin. Og þar sem lögbannið byggðist á yfirlýsingunni, sem sá sem skrifaði undir hana vissi ekki hvað innihéldi, felldi hann lögbannið úr gildi.

Í lögbannskröfunni kemur m.a. fram að Gaumur hefði lánað rúmlega 465 þúsund Bandaríkjadali, jafnvirði um 37 milljóna íslenskra króna, til kaupa og reksturs á Thee Viking. Þetta hefði verið gert gegn því að Jón Gerald myndi gefa út hlutabréf í fyrirtæki sem skráð var fyrir bátnum. Það loforð hefði hann svikið og hygðist hann nú selja bátinn til að greiða skuldir sínar. Lögmenn Gaums kröfðust að fá afhent öll skjöl varðandi viðskipti með bátinn fyrir dómi en auk þess fóru þeir fram á að fá afhent öll skjöl um samskipti Jóns Geralds við íslensk lögregluyfirvöld og íslenskar stofnanir.

Í samtali við Morgunblaðið sagði Jón Gerald að hann færi fram á 1,2 milljónir bandaríkjadala fyrir Thee Viking, jafnvirði um 95 milljóna íslenskra króna.