Eftir gagngerðar breytingar á gamla sjúkrahúsinu á Hólmavík verður hin endurbyggða og nýja Heilbrigðisstofnun nú um 850 fm að stærð með nýrri viðbyggingu á þremur hæðum. Afar brýnt þótti að ráðast í umbætur á húsnæðinu á Hólmavík sem var úr sér gengið og langt frá því að svara kröfum sem gerðar eru til hjúkrunarheimila.

Heilbrigðisstofnunin hefur nú tekið stakkaskiptum og er allur aðbúnaður vistamanna og starfsmanna gjörbreyttur. Litlum tveggja manna stofum var t.d. breytt í eins manns stofur, komið var fyrir tveimur litlum íbúðum á fyrstu hæð, lyfta sett í viðbygginguna, komið fyrir tveimur sjúkrastofum og rúmgóðri borð- og setustofu. Í kjallara er líkams- og iðjuþjálfun ásamt þvottahúsi og aðstöðu til frágangs á líni. Kostnaðurinn við endurbyggingu Heilbrigðisstofnunarinnar á Hólmavík er rúmar 126 milljónir króna á verðlagi ársins 2001. Ríkissjóður, Framkvæmdasjóður aldraðra og fjórir hreppar í Strandasýslu standa straum af kostnaði. Hrepparnir eru Broddanes-, Hólmavíkur-, Kaldrananes- og Árneshreppur.

Jón Kristjánsson, heilbrigðis- og tryggingamálaráðherra, tók húsnæðið formlega í notkun. Alþingismenn, sveitarstjórnarmenn í Strandasýslu, embættismenn heilbrigðis- og tryggingamálaráðuneytisins og fjölmargir aðrir gestir voru viðstaddir athöfnina.

Við athöfnina í dag flutti Jón Kristjánsson, heilbrigðismálaráðherra ávarp, Sigríður Óladóttir, sóknarprestur fór með blessunarorð, Haraldur V.A. Jónsson, oddviti Hólmavíkurhrepps og héraðsnefndar flutti ávarp, Jóhann Björn Arngrímsson, framkvæmdastjóri rakti sögu framkvæmda og Kvennakórinn Norðurljós söng nokkur lög. Að athöfn lokinni vargestum boðið til kaffisamsætis.