Lítilli fólksbifreið var ekið aftan á jeppa á austurenda Þjórsárbrúar á sunnudag. Segir lögreglan á Hvolsvelli að ökumaður fólksbifreiðinnar hafi ekki verið með hugann við aksturinn þar sem hann var að sýna farþegum sínum mannvirki nýrrar brúar yfir Þjórsár sem verið er byggja. Báðum bifreiðunum var ekið til austurs og er fólksbifreiðin talsvert skemmd á eftir. Hvorki ökumenn né farþega sakaði.

Á þriðjudaginn í síðustu viku varð nokkuð harður árekstur á Suðurlandsvegi til móts við afleggjara V-Landeyjarvegar en þar hafði jeppabifreið með hestakerru í eftirdragi verið ekið áleiðis vestur Suðurlandsveginn. Þegar bíllinn beygði til vinstri inn á V-Landeyjarveginn var ökumaður lítillar fólksbifreiðar að hefja framúrakstur og rákust bílarnir saman.

Ökumaður fólksbifreiðarinnar hlaut minni háttar meiðsl en var fluttur til skoðunar á heilsugæslustöðina á Hvolsvelli. Fólksbifreiðin var óökufær á eftir og er mjög mikið skemmd ef ekki ónýt. Grunur leikur á að ökumaður fólksbifreiðarinnar hafi ekki verið með bílbeltið spennt en hann var einn í bifreið sinni. Í liðinni viku voru 18 ökumenn kærðir fyrir of hraðan akstur á vegum innan umdæmis lögreglunnar á Hvolsvelli. Í þeim hópi voru nokkrir erlendir ferðamenn sem boðið var að ljúka málum sínum með greiðslu sektar á staðnum. Segir lögreglan að þessi frágangur mála hafi gengið mjög vel og án vandkvæða.

Þrír ökumenn voru teknir grunaðir um ölvun við akstur um síðastliðna helgi, einn á Rangárvallavegi á laugardag, annar við Hellu aðfaranótt sunnudagsins og loks var sá þriðji á Hvolsvelli eftir að hann hafði ekið bifreið sinni af Fljótshlíðarvegi ofan í skurð til móts við Stórólfshvol. Bifreiðin er mjög mikið skemmd ef ekki ónýt en ökumaðurinn, sem ekki var spenntur í öryggisbelti skarst lítið eitt á höfði og á höndum. Ökumaðurinn var fluttur með sjúkrabifreið á sjúkrahús í Reykjavík.

Þá hafði lögreglan afskipti af mjög ölvuðum reiðhjólamanni á Suðurlandsvegi rétt austan við Hvolsvöll aðfaranótt laugardagsins en reiðhjólamaðurinn hafði tekið reiðhjólið ófrjálsri hendi á Hvolsvelli. Reiðhjólamanninum var ekið til sín heima en reiðhjólið tekið í vörslu lögreglunnar og er þar enn þar sem ekki er vitað hver eigandinn er.