Einn tékknesku ferðamannanna, sem voru í rútu sem valt á veginum yfir Geldingadraga, gengst nú undir aðgerð á Landspítalanum í Reykjavík en hann var fluttur með þyrlu til borgarinnar. 9 til viðbótar voru fluttir með bílum til Reykjavíkur, 9 voru fluttir á sjúkrahús á Akranesi og 11, sem sluppu lítið sem ekkert meiddir, voru fluttir á heilsugæslustöðina í Borgarnesi til skoðunar. Alls voru 28 tékkneskir ferðamenn, einn íslenskur fararstjóri og einn íslenskur bílstjóri í rútunni sem var frá SBA-Norðurleið á Akureyri og á norðurleið þegar slysið varð.

Rútan valt Skorradalsmegin á veginum yfir Dragann eftir að hafa mætt gráleitum jeppa. Rútan rann um 20-30 metra á veginum eftir að hafa oltið. Atvik eru ekki fullljós og vill lögreglan hafa tal af ökumanni jeppans og biður hann því að gefa sig fram.

Þeir ellefu ferðamenn sem sluppu lítið eða ekkert meiddir fengu aðhlynningu á Heilsugæslunni í Borgarnesi. Ferðamennirnir sem allir eru tékkneskir og frekar við aldur, komu til landsins í morgun og voru á leiðinni til Akureyrar með rútu SBA Norðurleiðar þegar slysið varð.

Milena Drahczalova fararstjóri hópsins sagðist óljóst muna eftir slysinu. Jeppi hefði skyndilega birst á miðjum veginum og virtist rekast utan í rútuna sem valt inn á veginn og rann áfram nokkurn spöl. Rignt hefði glerbrotum yfir farþegana og fljótlega var ljóst að einhverjir voru slasaðir. Fjórir sjúkrabílar sóttu fólkið og í Borgarnesi var Rauði krossinn kallaður til enda um fjöldaslys að ræða.

Milena sagði að fólkið færi núna á Hótel Borgarnes þar sem það átti að fá að fara í sturtu, borða og hvíla sig og ennfremur stæði áfallahjálp þeim til boða. Ekki hafði verið tekin ákvörðun um framhaldið.