Friðbjörn Óskarsson, bílstjóri rútunnar sem valt á Dragavegi svokölluðum, á Geldingadraga í Borgarfirði, á laugardagsmorgun, segist hafa velt rútunni viljandi til að reyna að bjarga mannslífum. Í rútunni voru 28 tékkneskir farþegar auk tveggja leiðsögumanna og Friðbjörns. 20 manns voru fluttir á sjúkrahús og voru átta manns enn á sjúkrahúsum í gærkvöld, þar af þrír á gjörgæsludeild.

Friðbjörn segir í samtali við Morgunblaðið að eftir að hann mætti jeppa sem kom á móti hafi vegkanturinn gefið sig það mikið að hann hafði ekki örugga stjórn á bílnum. „Þegar ég var kominn aftur upp á veginn blasti við mér brött stórgrýtisbrekka. Annað hvort var að fara þar fram af eða láta bílinn fara í götuna. Ég vissi á þeirri stundu að bíllinn færi á hliðina en vissi jafnframt að með þessari ákvörðun gæti ég kannski bjargað einhverjum mannslífum." Friðbjörn telur öruggt að hefði rútan farið fram af brekkubrúninni, hefði hún lent á stóru bjargi fyrir neðan. „Ég taldi að það eina sem ég gæti gert væri að setja bílinn á hliðina."

Friðbjörn segir að fólkið í rútunni hafi ekki áttað sig á meiðslum sínum og gengið út úr bílnum en skömmu síðar hneig hver farþeginn af öðrum niður í götuna. „Þarna gekk karlmaður út, sem reyndist margbrotinn og allt í einu datt hann niður."

Friðbjörn hringdi á Neyðarlínuna og óskaði eftir aðstoð þyrlu vegna slasaðrar konu sem hrakaði stöðugt. Hann hringdi síðan aftur og var sagt að þyrlan væri á leiðinni. Nokkrum mínútum síðar kom sjúkrabíll með lækni sem skoðaði konuna. „Ég varð skelfingu lostinn þegar hann tók upp símann að lokinni skoðun og sagði að þyrlan mætti koma. Þarna var ég búinn að standa í þeirri trú í 25 mínútur að þyrlan væri að koma með þaulvana menn. Þá bíður hún í Reykjavík eftir því að læknir úrskurði að hennar sé þörf. Til hvers er verið að kenna bifreiðarstjórum á meiraprófsnámskeiðum að hiklaust eigi að biðja um þyrlu í rútuslysum ef menn telja ástæðu til?"

Viðtal Morgunblaðsins við Friðbjörn Óskarsson