Tæplega sextugur maður hefur verið dæmdur í tveggja ára fangelsi fyrir kynferðisbrot gegn þremur stúlkum. Ein þeirra var 7 ára og önnur 13 ára er brotin gegn þeim voru framin í fyrra. Þriðja stúlkan er barnabarn mannsins og sætti ítrekuðum brotum af hans hálfu frá 8-13 ára aldurs.

Héraðsdómur Suðurlands komst að þeirri niðurstöðu er dómur var upp kveðinn sl. miðvikudag, að gagnvart annarri 13 ára stúlkunni hefði verið um tvö brot að ræða, bæði á þáverandi heimili mannsins. Í öðru tilvikinu reyndi hann að strjúka brjóst hennar innan klæða og í hinu strauk hann líkama stúlkunnar innan klæða og snerti brjóst.

Þá var hann fundinn sekur um að hafa á heimili sínu káfað á líkama 7 ára stúlku, nuddað kynfæri hennar innan klæða og kysst hana á munninn.

Loks var hann sekur fundinn um að hafa frá árinu 1997 eða þar um bil og fram í desember sl. margoft káfað á líkama hinnar eldri stúlkunnar, brjóstum og kynfærum, innan og utan klæða, tekið í hönd hennar og látið hana snerta kynfæri sín. Átti það sér stað m.a. á heimili hans.

Dómurinn komst að þeirri niðurstöðu að brot mannsins væru almennt til þess fallin að valda þeim sem fyrir urða margvíslegum sálrænum erfiðleikum og ættu því stúlkurnar rétt á miskabótum úr hendi hans. Krafist var 3,7 milljóna í bætur en ekki var fallist á það nema að hluta þar sem maðurinn var dæmdur til að borga stúlkunum samtals 950 þúsund krónur í miskabætur.

Ennfremur var honum gert að borga allan sakarkostnað, þar með talin 180.000 króna málsvarnarlaun verjanda síns og 120.000 króna þóknun réttargæslumanns stúlknanna.

Verjandi mannsins krafðist sýknu af brotum gegn tveimur fyrstnefndu stúlkunum en á það var ekki fallist.