Tvö umferðaróhöpp urðu í gær í umdæmi lögreglunnar á Hvolsvelli og eru þau bæði rakin til hálku á vegum. Þannig valt fólksbíll, sem ekið var vestur Suðurlandsvegi í Landeyjum, vestan við Afall, en ökumaðurinn missti stjórn á bílnum á hálu yfirborði vegarins þegar mikil ísing myndaðist skyndilega.

Tvær ungar konur voru í bílnum á leið til Reykjavíkur þegar óhappið varð. Þær voru fluttar með lögreglubifreið til skoðunar á heilsugæslustöðina á Hellu en önnur kona kvartaði yfir eymslum í hálsi og baki. Báðar voru konurnar með bílbeltin spennt þegar óhappið varð. Bíllinn var fluttur af slysstað með kranabíl, en hann er mikið skemmdur ef ekki ónýtur.

Síðdegis í gær missti ungur ökumaður stjórn á bifreið sinni þar sem hann ók suður eftir Þrúðvangi á Hellu móts við veitingastaðinn Kristján X með þeim afleiðingum að bíllinn hafnaði framan á jeppabíl sem stóð kyrrstæður og mannlaus á merktu bifreiðastæði framan við veitingastaðinn. Mikið eignatjón varð á ökutækjunum en engin meiðsl á fólki.