Hjónin Jana og Ramin Sana fá dvalarleyfi hér á landi í eitt ár af mannúðarástæðum en þau hafa sótt um pólitískt hæli hér á landi. Útlendingastofnun ákvað þetta í dag og segir Georg Kr. Lárusson, forstjóri, að það hafi verið mat stofnunarinnar að hjónin uppfylltu ekki, eins og sakir stæðu, skilyrði svonefnds flóttamannasamnings sem Ísland er aðili að.

Georg sagði, að það hefði hins vegar verið mat stofnunarinnar, að að aðstæður hjónanna séu með þeim hætti, að ekki sé rétt að vísa þeim úr landi heldur veita þeim heimild til að dvelja hér á landi og gefa þeim kost á að aðlagast íslensku samfélagi.

Ramin er frá Afganistan en Jana frá Úsbekistan. Jana ól son í síðustu viku. Þau komu hingað til lands í febrúar og hafa beðið síðan í mars eftir svari við beiðni þeirra um pólitískt hæli hér á landi en þau neyddust til að yfirgefa heimalönd sín þar sem þeim var ekki vært vegna fordóma.