Eitt umferðarslys varð í umdæmi lögreglunnar á Hvolsvelli í vikunni þegar erlendur ökumaður jeppa missti stjórn á bíl sínum á Suðurlandsvegi austan við Rauðalæk í Holtum með þeim afleiðingum að bíllinn snérist, valt heilan hring utan við veginn og hafnaði á hjólnunum ofan í skurðgröfuskurði norðan við veginn. Bifreiðinni hafði verið ekið til austurs en framendi hennar snéri til vesturs ofan í skurðgröfuskurðinum.

Lögreglan segir, að ásamt ökumanni hafi þrír farþegar verið í bílnum, tvær konur og barn. Svo virðist sem ökumaðurinn og tveir farþegar hans hafi ekki verið með bílbeltin spennt því fólkið kastaðist út úr bílnum við veltuna og meiddist eitthvað, þó ekki mikið. Barnið, sem var spennt í bílbelt í aftursæti sakaði ekki.

Fólkið var flutt á heilsugæslustöðina á Hellu til skoðunar og í framhaldi af því var það flutt með tveimur sjúkrabílum í sjúkahús Landspítalans við Fossvog í Reykjavík. Bíllinn er talsvert skemmdur.

Lögreglan segir ljóst, að ef allir sem í bifreiðinni voru hefðu verið með bílbeltin spennt þá hefði farið mun betur því yfirbygging jeppans var mjög heilleg þótt nokkrar rúður hefðu brotnað. Bíllinn var fjarlægður af vettvengi með kranabíl.