Lögregla í Fjarðabyggð hefur rætt við hundruð manns í tengslum við líkfund í höfninni í Neskaupstað í gærmorgun en enginn hefur stöðu grunaðs manns enn sem komið er, að sögn Jónasar Wilhelmssonar yfirlögregluþjóns á Eskifirði. Lýsir lögreglan eftir fólki sem kann að geta veitt upplýsingar um grunsamlegar mannaferðir við Netagerðina í Neskaupstað. Kafað hefur verið í höfninni í leit að frekari gögnum og verður væntanlega kafað þar aftur síðar í dag.

Kannaðar hafa verið skipaferðir um hafnir í Fjarðabyggð undanfarna daga en engan hefur vantað um borð í tugi skipa sem haft hafa viðkomu þar frá í síðustu viku.

Þá hefur ítarleg athugun farið fram á Kárahnjúkasvæðinu bæði varðandi starfsmenn sem þar eiga að vera að störfum og eins vegna þeirra sem eru í fríi og vantar þar engan.

Líkið sem fannst í gærmorgun var pakkað inn í plast og við það fest veiðarfærafarg, keðja og bobbingur sem hafður er á trolli til að sökkva því. Lögreglan telur sig nokkuð vissa um að hér sé um Evrópubúa að ræða. Lík mannsins verður flutt til Reykjavíkur til krufningar í dag.

Sýslumaðurinn á Eskifirði sendi í morgun frá sér svohljóðandi yfirlýsingu vegna málsins:

„Maður fannst látinn við hafnargarð sunnan við Netagerðina í Neskaupstað klukkan 11 í gær. Líkið var pakkað inn í plast og var farg fest við það. Við skoðun komu í ljós áverkar. Líkið er af karlmanni af evrópskum uppruna en ekki hafa verið borin kennsl á það enn. Málið er rannsakað sem voveiflegt mannslát og er rannsóknin unnin í samvinnu við ríkislögreglustjórann og tæknideild lögreglunnar í Reykjavík.

Allir þeir sem geta gefið upplýsingar um grunsamlegar mannaferðir við Netagerðina í Neskaupstað síðustu 4-5 daga eru beðnir um að hafa samband við lögreglu. Það sama á við á Eskifirði og Reyðarfirði og ef menn hafa orðið varir einhverra mannaferða þar sem geta hugsanlega talist grunsamlegar eru þeir beðnir að hafa samband við lögregluna á Eskifirði í símum 892 8859, 476 1231 eða 477 1332.“