Talið er að dánarorsök mannsins, sem fannst látinn í höfninni í Neskaupstað, hafi ekki verið útvortis áverkar heldur hafi fíkniefni, sem hann bar innvortis, valdið dauða hans. Samkvæmt heimildum Morgunblaðsins kom þetta fram við krufningu líksins í Reykjavík í gær. Staðfest var að manninum hefðu verið veittir áverkar, en talið að þeir hefðu ekki valdið dauða hans.

Samkvæmt upplýsingum blaðsins hefur sú spurning vaknað, hvort maðurinn hafi verið svokallað burðardýr fyrir fíkniefni, en það hefur ekkert fengizt staðfest.

Ekki borin kennsl á líkið

Enn hefur ekki tekizt að bera kennsl á líkið. Mynd af líkinu var send á allar lögreglustöðvar í landinu í gær til að kanna, hvort lögreglumenn annars staðar á landinu hefðu haft af manninum afskipti.

Þá hefur aðstoðar kennslanefndar ríkislögreglustjóra verið leitað við að bera kennsl á líkið. Óvíst er hversu langur tími fer í rannsókn nefndarinnar, enda er vinna hennar mikið nákvæmnisverk.

Í gærkvöldi störfuðu níu lögreglumenn að því fyrir austan að reyna að upplýsa málið, auk þeirra sem vinna að rannsókninni annars staðar á landinu.

Fólk, sem var á gráum Mitsubishi-bíl sem lýst hafði verið eftir vegna rannsóknar málsins, gaf sig fram við lögreglu í gær. Jónas Wilhelmsson, yfirlögregluþjónn á Eskifirði, segir að fólkið hafi ekki tengzt málinu á nokkurn hátt. Hins vegar hefur enginn gefið sig fram og sagzt hafa verið á ferð um bryggjuna um klukkan þrjú aðfaranótt miðvikudags, en vitni sá þá bílljós á bryggjunni.