Þrír menn, tveir Íslendingar og einn Lithái, gáfu sig fram við lögregluna í Reykjavík í gærmorgun eftir að lýst var eftir þeim í tengslum við líkfundinn í Neskaupstað. Eftir skýrslutöku hjá efnahagsbrotadeild ríkislögreglustjóra voru þeir frjálsir ferða sinna.

Ekki er búið að bera kennsl á líkið, sem fannst í höfninni á miðvikudaginn í síðustu viku, samkvæmt heimildum Morgunblaðsins. Alþjóðadeild ríkislögreglustjóra sendi fingraför mannsins á samskiptanet alþjóðalögreglunnar Interpol á föstudagskvöld. Upplýsingar frá lögregluyfirvöldum í Evrópu, sem geta hjálpað við að bera kennsl á líkið, hafa ekki borist. Það er einnig háð því að gögn um manninn sé að finna í fingrafarabönkum yfirvalda.

Lögreglan á Akureyri hefur haft gráan jeppa í sinni vörslu í nokkra daga. Talið er hugsanlegt að bíllinn tengist málinu en hann hefur ekki enn verið rannsakaður.

Skýrslutaka norsku lögreglunnar af skipverjum á skipinu Senior, sem lá í höfninni í Neskaupstað helgina áður en líkið fannst, mun að öllum líkindum ekki varpa meira ljósi á málið, samkvæmt heimildum blaðsins.