Björgvin Sigurðsson og Ragnar Jónsson, sérfræðingar frá tæknideild lögreglunnar í Reykjavík, rannsökuðu í gær ítarlega Mitsubishi Pajero-jeppann sem lögreglan á Akureyri tók í vörslu sína í tengslum við rannsókn á líkfundinum í höfninni í Neskaupstað fyrir viku. Ekki hafa enn verið borin kennsl á líkið og niðurstaða úr krufningu liggur ekki fyrir. Vísbendingar benda til að maðurinn hafi verið Lithái og voru föt hans merkt á litháensku.

Meðal þess sem sérfræðingarnir könnuðu í jeppanum í gær voru hár, blóð og önnur lífsýni sem höfðu getað leynst í bílnum, sætum hans og farangursgeymslu. Beittu lögreglumennirnir m.a. sérstökum fjölbylgjuljósgjafa sem greinir hluti sem sjást ekki með berum augum. Jeppinn er frá bílaleigu og hefur verið skilað til eigenda aftur. Annar Íslendingurinn og Litháinn, sem gáfu sig fram við lögreglu í fyrradag, keyrðu á þessum jeppa frá Reykjavík og austur í Neskaupstað. Skiluðu þeir honum aftur til bílaleigunnar er komið var aftur suður.