Starfsfólki við kennslu í grunnskólum hefur fjölgað ár frá ári, en haustið 1998 voru 4.045 kennarar í grunnskólum landsins. Skýrist fjölgunin m.a. af því að grunnskólanemendum hefur fjölgað og einsetning skóla staðið yfir.

Kennurum með kennsluréttindi fjölgaði um 107, eða 2,8%, frá fyrra ári. Kennurum án kennsluréttinda fækkaði um 61 frá árinu áður, eða um 6,6%. Þetta eru tölur úr gagnasafni Hagstofu Íslands, sem safnar upplýsingum um starfsfólk í grunnskólum á Íslandi í október ár hvert.

Alls eru 3.873 kennarar með kennsluréttindi starfandi í grunnskólum landsins, eða 81,7% alls starfsfólks við kennslu. Hlutfallið hefur hækkað um 1,5 prósentustig frá haustinu 2002. Frá því Hagstofan hóf söfnun upplýsinga um kennara hefur þetta hlutfall farið hæst haustið 1999, í 83,5%.

Konum með kennsluréttindi hefur fjölgað um 101 frá haustinu 2002, á meðan körlum með kennsluréttindi fjölgaði aðeins um sex. Þegar litið er á heildarfjölda starfsfólks við kennslu fækkaði körlum um fjóra en konum fjölgaði um 50 frá síðasta ári. Hlutfall kvenna meðal starfsfólks við kennslu í grunnskólum hefur því hækkað og er nú 76,7%.

Kvenskólastjórum fjölgar

Kvenskólastjórum hefur fjölgað um fjóra frá fyrra ári þrátt fyrir að skólastjórum hafi fækkað um fimm. Eru konur nú 43% skólastjóra. Kvenaðstoðarskólastjórum hefur hins vegar fækkað um sjö og eru þær 62% aðstoðarskólastjóra.

Kennurum með kennsluréttindi hefur fjölgað hlutfallslega mest á Austurlandi, um fjögur prósentustig. Á höfðuðborgarsvæðinu utan Reykjavíkur fjölgaði kennurum með kennsluréttindi um 3,1 prósentustig og á Vestfjörðum þrjú prósentustig. Á Suðurlandi fækkaði kennurum með kennsluréttindi um 3,3 prósentustig. Hlutfall kennara sem hafa kennsluréttindi er mun hærra á höfuðborgarsvæðinu en á landsbyggðinni. Alls hafa tæplega 91% kennara á höfuðborgarsvæðinu kennsluréttindi en utan höfuðborgarsvæðisins er hlutfall réttindakennara á bilinu 56-76%, hæst á Suðurlandi.

Eldri kennurum fjölgar

Starfsfólki við kennslu hefur fjölgað í aldurshópunum yfir fimmtugu frá hausti 2002, en kennurum undir 35 ára aldri hefur fækkað. Tæplega 300 (298) kennarar eru á sjötugsaldri, og munu þeir því fara á eftirlaun á næstu árum. Kennurum á sjötugsaldri hefur farið hægt fjölgandi, en þeir voru 232 haustið 1998.

Rúmlega 15% (15,1%) starfsfólks við kennslu haustið 2002 stunduðu ekki kennslustörf á grunnskólastigi haustið 2003. Þetta er lítið eitt meira brottfall en árið áður en svipað og árið 1999. Brottfall úr kennslu er hlutfallslega meira meðal þeirra sem ekki hafa kennsluréttindi og meðal þeirra sem eru í hlutastarfi. Rúmlega 11% (11,1%) réttindakennara haustið 2002 sneru ekki aftur til kennslu haustið 2003 og tæplega 32% (31,6%) réttindalausra kennara.