Mál ríkislögreglustjóra gegn fimm sakborningum vegna stórfellds fjárdráttar hjá Landsíma Íslands, var þingfest í Héraðsdómi Reykjavíkur í morgun. Sveinbjörn Kristjánsson, fyrrum aðalgjaldkeri Símans, er ákærður fyrir 261 milljónar króna fjárdrátt hjá Landssíma Íslands og fjórir aðrir sakborningar sæta ákæru fyrir hylmingu. Sveinbjörn játaði að hafa dregið sér rúmar 250 milljónir en neitaði því að hafa dregið sér 10,9 milljónir sem einnig er ákært fyrir. Aðrir sakborningar neituðu sök utan Árni Þór Vigfússon, sem óskaði eftir viku fresti til að tjá sig um sakarefnið þar sem verjandi hans er í útlöndum.

Sveinbjörn er ákærður fyrir brot á 247. grein almennra hegningarlaga sem kveður á um allt að 6 ára fangelsi fyrir fjárdrátt. Meðákærðu er gefin að sök hylming samkvæmt 254. gr. hegningarlaga sem kveður á um allt að 4 ára fangelsi, en peningaþvætti til vara samkvæmt 264 gr. hegningarlaga sem kveður á um allt að 4 ára fangelsi. Þeir Kristján Ra. Kristjánsson og Árni Þór eru ákærðir fyrir að hylma yfir fjárdrátt fyrrverandi aðalgjaldkera Landssímans og er fjárhæðin 120 til 130 milljónir króna. Einnig eru þeir ákærðir fyrir móttöku og ráðstöfun fjármuna til einkanota.

Ragnar Orri Benediksson er ákærður fyrir að hafa tekið við um 9,3 milljónum milljónum króna frá Sveinbirni og notað í eigin þágu og einkahlutafélags síns og ráðstafað 22,2 milljónum til viðbótar samkvæmt fyrirmælum Sveinbjarnar.

Loks er Auður Harpa Andrésdóttir ákærð fyrir að hafa tekið við samtals 3 milljónum króna og ráðstafað þeim samkvæmt fyrirmælum Sveinbjarnar.