„Við skildum ekki hvaðan á okkur stóð veðrið þegar við fengum bréfið. Því miður virðist stofnunin hafa sent þetta bréf eitthvað út í loftið án þess að hafa skoðað málið betur,“ segir segir Jónas Egilsson, formaður Frjálsíþróttasambands Íslands (FRÍ), um bréf sem sambandinu barst frá stofnuninni þess efnis að heimasíða FRÍ stæðist ekki samkeppnislög.

„Við erum ekki með neina sölustarfsemi á síðunni, á henni er einungis veitt sú þjónusta að upplýsa um mótahald og árangur frjálsíþróttamanna. Þar er fyrst og fremst um fréttaflutning að ræða,“ bætir Jónas við.

Hann segir erindi Samkeppnisstofnunar afar formlegt og samkvæmt fréttum hafi það verið sent þúsundum aðilja sem veiti sem veita rafræna þjónustu á Netinu.

„Það er skírskotað til tiltekinna greina samkeppnislaga án þess að útskýra málið frekar. Þar segir að við skoðun á síðum á léni okkar hafi í ljós komið að þær upplýsingar sem þar er að finna uppfylla ekki ákvæði laganna án þess að það sé tilgreint frekar. Við erum eiginlega lamaðir yfir þessari sendingu hjá sambandinu.

„Maður hlýtur að spyrja sig hvort þetta sé nútíma stjórnsýsla og hvort menn eru lagðir undir grun að óathuguðu máli. Við teljum starfsemi okkur aðeins falla undir íþróttalög, ekki samkeppnislög og höfum farið fram á skýringar hjá Samkeppnisstofnun en því bréfi okkar hefur ekki verið svarað,“ segir Jónas Egilsson formaður FRÍ við Fréttavef Morgunblaðsins (mbl.is).

Jónas segist hafa ritað Samkeppnisstofnun bréf sl. fimmtudag og farið fram á skýringar á erindinu en engar fengið enn. „Við getum ekki áttað okkar á því á hvern hátt FRÍ er brjóta í bága við samkeppnislög eða annað sem heyrir undir Samkeppnisstofnun, enda varða samkeppnisákvæði reglna FRÍ íþróttakeppni en ekki viðskipti,“ segir Jónas.