Næstu þrjár vikurnar munu ferðamenn frá Belgíu, Noregi, Svíþjóð, Þýskalandi, Danmörku og Finnlandi, ásamt Íslendingum, ferðast um landið á 113 húsbílum, að því er greint er frá í frétt Bergens Tidende. Á þriðjudag lögðu síðustu 39 húsbílarnir, sem munu taka þátt í ferðinni um Ísland, af stað með ferjunni Norrænu frá Bergen í Noregi, en Norræna lagðist að bryggju á Seyðisfirði nú í morgun.

Íslensku hjónin Sigrún Haraldsdóttir og Jón Gunnar Þorkelsson hafa skipulagt ferðina í samvinnu við húsbílasamtök á Norðurlöndum. Hugmyndin var fyrst kynnt á fundi norrænna húsbílaeigenda og frá þeim tíma hafa áhugamenn um hana unnið að því að koma henni í framkvæmd.

Er gert ráð fyrir að húsabílaferðalangar muni skoða ýmsa markverða staði meðan á ferð þeirra um landið stendur, allt frá jöklum til höfuðborgarsvæðisins. Ferðalangarnir hyggjast baða sig í heitum lækjum og fara í reiðtúra á íslenskum hestum, kynna sér menningu og halda grillveislu, svo eitthvað sé nefnt.

Ferðafólkið mun þó sjálft ráða för meðan það dvelst hér. Það þarf einungis að gæta þess að mæta á bryggjuna á Seyðisfirði daginn sem það á að halda heim á leið á ný með Norrænu. Þá munu sumir ferðalanganna hafa lagt að baki um 2.200 kílómetra, að því er frá greinir í Bergens Tidende.