Fyrsti flutningsmaður tillögunnar er Össur Skarphéðinsson, formaður Samfylkingarinnar, og að henni standa jafnframt formenn Frjálslynda flokksins og Vinstri hreyfingarinnar – græns framboðs.

Er líka lagt til að Ísland verði tekið af lista hinna sjálfviljugu þjóða og að Alþingi lýsi því yfir að stuðningur við innrásina í Írak hafi verið mistök.

Önnur tillaga til þingsályktunar frá Samfylkingunni fjallar um stofnun embættis talsmanns neytenda, sem ætlað er að styrkja stöðu neytenda á markaði.

Þá mun Samfylkingin leggja til að gert verði sérstakt fjárfestingarátak í öllum stigum menntakerfisins, þar sem markmiðið er að leggja 15 milljarða króna til menntakerfisins, umfram það sem ríkisstjórnin hefur áætlað til menntamála, á einu kjörtímabili og síðan aftur á næsta kjörtímabili þar á eftir. Segir flokkurinn að útreikningar sýni að varanleg hagvaxtaráhrif af þessum fjárfestingum verði 1%.

Samfylkingin mun ennfremur leggja fram frumvarp til laga um að matarskattur verði lækkaður úr 14% í 7% af nauðþurftum. Er áætlað að matarreikningur almennings muni með þessu lækka um ríflega fimm milljarða króna.