Sigurður Ásgrímsson sprengjusérfræðingur, Hafsteinn Hafsteinsson forstjóri, Björn Bjarnason dómsmálaráðherra, Þorsteinn Davíðsson aðstoðarmaður ráðherra, Þorsteinn Geirsson ráðuneytisstjóri og Stefán Eiríksson skrifstofustjóri virða fyrir sér nýja vélmennið. Inni í bifreiðinni er Ágúst Magnússon sprengjusérfræðingur að stjórna vélmenninu. LHG/Dagmar Sigurðardóttir

Í frétt frá Landhelgisgæslunni segir að hún hafi verið í miklum og góðum samskiptum við danska herinn í áratugi og hafi sprengjusérfræðingar stofnunarinnar m.a. sótt menntun og þjálfun til hans.

„Þegar forstjóri og sprengjusérfræðingar Landhelgisgæslunnar voru í heimsókn hjá danska hernum í febrúar á þessu ári var þeim m.a. boðið að skoða útbúnað sprengjueyðingarsveitar danska landhersins. Við það tækifæri var upplýst að fyrirhugað væri að endurnýja hann seinna á árinu. Í framhaldi af því ákvað danski herinn að gefa Landhelgisgæslunni þann búnað sem verið var að skipta út.

Vélmennin, sem eru af gerðinni HOBO, eru smíðuð í Írlandi. Hægt er að fjarstýra þeim í leit að sprengjum og við eyðingu þeirra og draga þannig úr hættu á að sprengjusérfræðingar slasist eða látist við skyldustörf. Helstu kostir vélmennanna, umfram það vélmenni sem Landhelgisgæslan á fyrir, eru að hægt er að nota þau til fjölbreytilegri verkefna og með skjótvirkari hætti. Þau eru einnig talsvert aflmeiri. Vélmennin eru flutt milli staða með bifreiðum sem eru sérútbúnar í þeim tilgangi. Í þeim eru margs konar tæki sem sprengjusérfræðingar nota, t.d. myndavélar og vopn til sprengjueyðingar.

Það er mikil framför fyrir Landhelgisgæsluna að fá þennan búnað og er mikilsvert framlag til öryggismála á Íslandi.

Fjórir fulltrúar danska hersins verða hér á landi næstu daga til að kenna sprengjusérfræðingum Landhelgisgæslunnar á búnaðinn og þjálfa þá í notkun hans,“ segir í frétt Landhelgisgæslunnar.