Einar K. Guðfinnsson, þingflokksformaður Sjálfstæðisflokksins, segir á vefsíðu sinni, þar sem hann fjallar um málefni olíufélaganna, að dómstólar götunnar muni, ef að líkum lætur, verða ákaflega virkir á næstunni "og taka menn óhikað af lífi". Hann minnir hins vegar á að menn séu saklausir þar til sekt sé sönnuð.

"Það ríkir mikil reiði í garð olíufélaganna í kjölfar skýrslu Samkeppnisstofnunar," segir þingmaðurinn í upphafi greinar sinnar á ekg.is. "Skýrslan kveður á um meint verðsamráð olíufélaganna og á grundvelli hennar telur samkeppnisráð að fyrir það beri þau að gjalda milljarða króna. Þetta er hluti af því regluverki og því fyrirkomulagi sem við höfum sett upp með löggjöf. Því er ætlað að tryggja réttláta málsmeðferð, að menn fari að lögum og að þeir sem bornir eru sökum eigi rétt."

Hann segir mjög mikilvægt að menn hafi þetta í heiðri. "Það er hins vegar ekki gert hjá dómstólum götunnar. Þeir munu hins vegar verða ákaflega vel virkir á næstunni, ef að líkum lætur og taka menn óhikað af lífi. Þetta eru sannarlega velmektardagar þessa dómstigs. En reynslan sýnir að sá dómstóll fer ekki eftir leikreglum en dæmir eitt í dag og annað á morgun. Hjá honum getur skúrkur dagsins í dag orðið hetja morgundagsins - og öfugt."

Einar segir dæmi um að dómstólar götunnar hafi farið offari. "Við þekkjum dæmi úr nýliðinni sögu, þar sem menn voru bornir þungum sökum, þar sem dómstólar götunnar fóru offari, þar sem stjórnmálamenn dagsins hoppuðu á vinsældarvagninn og tóku sér þar far. Menn voru jafnvel saklausir hnepptir í fangelsi eða sviptir störfum sínum í gerningahríðinni. Nýverið hafa þessir atburðir verið rifjaðir upp og öllum ljóst að þeir sem felldu þyngstu dómana og fóru fremstir í stóryrðunum hafa haft lítinn sóma af. Það væri hollt að minnast þessa núna."

Málin verði könnuð

Einar segir þó eðlilegt að olíuverðsmálin verði könnuð. Rétt eins og verið sé að gera. "Þýðingarmikið er að það sé gert á þeim forsendum sem lög gera ráð fyrir og lyktir málsins séu ákvarðaðar af til þess bærum aðilum." Hann segir einnig eðlilegt að umræða fari fram og að menn hafi skoðanir. "Það er einfaldlega þáttur í lýðræðislegu nútímasamfélagi. Í slíkri umræðu þarf hins vegar að gæta þess að öll sjónarmið komist til skila. Það er eitt þeirra hlutverka sem fjölmiðlar landsins eiga að sinna."