Þetta segir Georg Ólafsson, forstjóri Samkeppnisstofnunar, vegna ummæla Kristins Björnssonar, fyrrverandi forstjóra Skeljungs, í viðtali í Morgunblaðinu í gær en þar segir Kristinn m.a. að það hafi verið mistök hjá Samkeppnisstofnun að heimila stofnun Olíudreifingar á sínum tíma. Með stofnuninni og blessun Samkeppnisstofnunar hafi skapast kjöraðstæður fyrir félögin tvö, Esso og Olís, til víðtækrar samvinnu.

Georg segir að þegar samkeppnisyfirvöld hafi heimilað starfsemi Olíudreifingar á sínum tíma hafi þau verið fullvissuð um að starfsemin myndi skila mikilli hagræðingu sem kæmi neytendum til góða og enn fremur að starfsemin hefði ekki nein áhrif á samkeppni á milli olíufélaganna.

"Í ljós hefur hins vegar komið að samráð hefur verið viðhaft innan Olíudreifingar og um það er fjallað í ákvörðun samkeppnisráðs og í ákvörðuninni eru jafnframt sett skilyrði sem eiga að tryggja að starfsemi Olíudreifingar raski ekki framvegis samkeppni á olíumarkaðinum," segir Georg.