Talið er að nokkur hundruð tonn af hjólbörðum hafi brunnið hjá endurvinnslufyrirtækinu Hringrás við Klettagarða í nótt. Fyrirtækið byrjaði að safna gúmmíhjólbörðum snemma á þessu ári, m.a. frá Sorpu. Hjólbarðana átti síðan að tæta niður og urða. Samkvæmt heimildum Morgunblaðsins var ástæðan fyrir því að hjólbarðahaugurinn var svona stór nú, að verið var að vinna að því að finna aðra leið til að eyða þeim. Jafnvel að senda þá úr landi með skipi.

Í yfirlýsingu, sem Hringrás hefur sent frá sér vegna brunans, er eldsvoðinn harmaður. Einnig harmar félagið þau óþægindi og röskun sem nágrannar, bæði fyrirtæki og einstaklingar, hafi orðið fyrir vegna brunans. Segir þar ljóst að félagið hafi orðið fyrir miklu tjóni sem það sé þó að verulegu leyti tryggt fyrir. Segir að um leið og slökkvistarfi sé lokið verði farið í það að hreinsa svæðið og reynt að ljúka því verki á sem skemmstum tíma.

Þá kemur fram að forráðamenn félagsins vilji koma á framfæri sérstöku þakklæti til slökkviliðs og lögreglu og annarra sem unnið hafi frábært starf við að ráða niðurlögum eldsins.