Móttaka brotajárns og vinnsla er hafin á nýjan leik hjá endurvinnslufyrirtækinu Hringrás við Klettagarða eftir stórbrunann sem kom upp á lóð fyrirtækisins á mánudagskvöldið.

Starfsmenn Hringrásar kepptust í gær við hreinsunarstörf á starfssvæðinu en Einar Ásgeirsson, framkvæmdastjóri fyrirtækisins, segir þó enn of snemmt að segja neitt til um hversu miklu tjóni fyrirtækið varð fyrir í brunanum.

Nokkur hundruð tonn brunnu úr 2.000-2.500 tonna haugnum

Ætlað er að tvö til tvö þúsund og fimm hundruð tonn hafi verið í dekkjahaugnum sem kviknaði í, en að sögn Einars brann þó ekki nema hluti haugsins eða nokkur hundruð tonn. Slökkviliðsmönnum og öðrum starfsmönnum tókst að koma í veg fyrir að eldur bærist í meginhluta haugsins og voru stórvirkar gröfur notaðar við að fjarlægja dekkin. Einar segir slökkviliðsmenn og aðra þá sem komu að þessu verki eiga mikinn heiður skilinn og sagðist hann vilja koma miklu þakklæti á framfæri vegna þess.

Í gær hófst svo flutningur á tættum dekkjum í Sorpu, til böggunar og urðunar. Einar segir að Hringrás muni ekki taka á móti dekkjum nema þá í samráði við Heilbrigðis- og umhverfisstofu um fyrirkomulag þess. Einar segir aðspurður að fyrirtækið ætli að halda áfram starfsemi sinni í Sundahöfn. "Við horfum björtum augum til framtíðarinnar," segir Einar. "Við ætlum að fara í fyrirbyggjandi aðgerðir og munum ekki slá slöku við fyrr en við erum búnir að uppfylla skilyrði og gera gott betur en það. Við ætlum okkur að hafa allan aðbúnað hér eins og best verður á kosið svo eftirlitsaðilar verði ánægðir með það sem þeir sjá hér hjá okkur.

Þetta er mikið áfall en þegar svo er, snýr alvöruhópur starfsmanna bökum saman og vindur sér í verkin."