Týr, varðskip Landhelgisgæslunnar sigldi til móts við flutningaskipið Dettifoss í kvöld eftir að fulltrúi Eimskips óskaði eftir aðstoð þar sem hann varð stýrisvana 8 sjómílur austur af Eystrahorni. Ekki er talið að Dettifoss sé í bráðri hættu enda rekur skipið í átt frá landi en tilkynningin barst kl. 20.25.

Samkvæmt áætlun átti Týr að vera kominn að Dettifossi um tíuleytið en fyrirhugað er að byrja á að kanna hvort stýrisblað er dottið af skipinu eða hvort eitthvað annað veldur því að skipið lætur ekki að stjórn. Ef ekki verður hægt að lagfæra bilunina mun varðskipið draga Dettifoss til hafnar á Eskifirði. Reiknað er með að þá þurfi Týr að draga Dettifoss um 50 sjómílur til Eskifjarðar en ekki er vitað hvenær skipin koma þangað. Nú sem stendur er suðvestan rok á svæðinu og mikill sjór.

Var það á leið frá Reykjavík til Eskifjarðar en skipið er notað til gámaflutninga milli Íslands, Færeyja og annarra Evrópulanda.