Varðskipin Týr og Ægir eru ásamt Dettifossi um 20 sjómílur austur af mynni Reyðarfjarðar. Týr var byrjaður að draga Dettifoss áleiðis til Reyðarfjarðar en um klukkan 16 í dag slitnaði taugin og hefur ekki tekist að koma taug í Dettifoss aftur en vont veður er á svæðinu, 26 metrar á sekúndu, og komið niðamyrkur. Samkvæmt upplýsingum frá stjórnstöð Landhelgisgæslunnar verður ekki verði reynt að koma taug yfir í Dettifoss á ný fyrr en á morgun.

Stýrisbúnaður Dettifoss, skips Eimskipafélagsins, bilaði um klukkan 20 í gærkvöldi þegar skipið var um 8 sjómílur austur af Eystrahorni en hluti stýrisblaðs skipsins virðist hafa dottið af.

Varðskipið Týr kom að Dettifossi um kl. 22 í gærkvöldi. Taug var komið í Dettifoss en hún slitnaði kl. 23:37. Um tvöleytið var aftur búið að koma taug í Dettifoss og hafist handa við að draga hann í átt til Eskifjarðar. Illa gekk að snúa Dettifossi vegna þyngdar skipsins. Um kl. 1:51 slitnaði línan á milli skipanna.

Klukkan 4:30 óskaði Týr eftir aðstoð varðskipsins Ægis en þá hafði tekist að koma taug í Dettifoss að nýju en ekkert gekk að snúa skipinu. Ægir var kominn á svæðið kl. 10 í morgun. Tý tókst að draga Dettifoss af stað og kl. 14 voru skipin á leið til Reyðarfjarðar á 2,5 sjómílna hraða. Tý gekk erfiðlega að stjórna Dettifossi og þess vegna var taug sett á milli varðskipsins Ægis og varðskipsins Týs. Það tókst kl. 15:40. Tuttugu mínútum síðar hafði taugin milli Dettifoss og Týs slitnað. Skipin voru þá stödd 28 sjómílur austur af Breiðdalsvík.

Þrettán manns eru í áhöfn Dettifoss og höfðust þeir allir vel við að sögn Halldórs V. Guðmundssonar skipstjóra á Dettifossi þrátt fyrir leiðinda velting. Dettifoss, sem er 14.664 brúttótonn að stærð, er fulllestaður af gámum. Skipið var á leið frá Reykjavík til Eskifjarðar þegar bilunin varð. Samkvæmt upplýsingum frá Eimskip verður unnið að könnun á skemmdum á Dettifossi á Eskifirði og að henni lokinni verður tekin ákvörðun um hvar viðgerð verður framkvæmd.