Enn hefur ekki verið reynt að koma taug á milli varðskipsins Týs og flutningaskipsins Dettifoss, sem er stýrisvana austur af Reyðarfirði. Rekur skipin hægt til norðurs undan miklu hvassviðri, samkvæmt upplýsingum frá stjórnstöð Landhelgisgæslunnar í morgun. Beðið verður með að reyna að koma taug milli skipanna uns veður lægir. Engin hætta er á ferðum.

Stýrið á Dettifossi bilaði á föstudagskvöldið úti fyrir Eystrahorni, og frá því Týr kom á staðinn skömmu síðar hafa verið gerðar ítrekaðar tilraunir til að draga Dettifoss en taugin milli skipanna hefur jafnan slitnað.

Varðskipið Ægir er einnig á staðnum og reynt hefur verið að beita báðum varðskipunum til að draga Dettifoss, en án árangurs.

Þrettán manns eru í áhöfn Dettifoss og höfðust þeir allir vel við að sögn Halldórs V. Guðmundssonar skipstjóra á Dettifossi þrátt fyrir leiðinda velting. Dettifoss, sem er 14.664 brúttótonn að stærð, er fulllestaður af gámum. Skipið var á leið frá Reykjavík til Eskifjarðar þegar bilunin varð.