Ástæða þess að til ryskinga kom milli Bobbys Fischers og fangavarða í síðustu viku var sú, að Fischer „fannst sér ögrað“, að sögn Sæmundar Pálssonar, vinar Fischers, er hitti skákmeistarann í dag og ræddi við hann í hálfa klukkustund. „Hann er kominn með skegg eins og Leonardo da Vinci,“ sagði Sæmundur m.a. á blaðamannafundi sem haldinn var í Tókýó í dag.

Í kjölfar ryskinganna, er hófust vegna deilna um morgunverð Fischers á miðvikudaginn, var hann settur í fjögurra daga einangrun. Fischer verður 62 ára á miðvikudaginn.

Í frétt AFP-fréttastofunnar af blaðamannafundinum í dag, sem haldinn var eftir að Sæmundur, Miyoko Watai, unnusta Fischers, og Guðmundur G. Þórarinsson hittu Fischer, er ennfremur haft eftir Sæmundi að Fischer hafi kvartað undan sífelldum höfuðverk og svima. Watai sagði hann andlega og líkamlega úrvinda og hafa „misst alla von og trú á lífið“.