Páll Skúlason hefur kennt við heimspekiskor frá því að henni var komið á fót árið 1971, en hann var skipaður prófessor árið 1975. Hann hefur því, að sögn skipuleggjenda málþingsins, verið einn þeirra sem hafa mótað skorina frá upphafi. Páll er afkastamikill fræðimaður og um það vitnar fjöldi útgefinna bóka um heimspeki og mikill fjöldi greina. Þá hefur Páll frá upphafi lagt sig fram um að kynna heimspekina almenningi. Hann stóð að stofnun Félags áhugamanna um heimspeki 1976 og var lengi formaður þess, stofnaði Siðfræðistofnun 1989 og var stjórnarformaður hennar þar til hann tók við starfi rektors HÍ 1997.

Á málþinginu, sem haldið verður 8. og 9. apríl í Hátíðarsal Háskóla Íslands, munu heimspekingarnir Björn Þorsteinsson, Eyjólfur Kjalar Emilsson, Guðmundur Heiðar Frímannsson, Gunnar Harðarson, Jón Kalmansson, Kristján Kristjánsson, Mikael M. Karlsson, Ólafur Páll Jónsson, Róbert H. Haraldsson, Salvör Nordal, Sigríður Þorgeirsdóttir, Sigurður Kristinsson, Svavar Hrafn Svavarsson, Vilhjálmur Árnason, Þorsteinn Gylfason og Þorvarður Árnason, flytja fyrirlestra um heimspeki Páls og hugðarefni. Fyrirhugað er að greinarnar komi út á bók á afmælisdegi Páls.