Kvikmyndaeftirlit ríkisins hefur sent Ísleifi Þórhallssyni, skipuleggjanda kvikmyndahátíðarinnar Iceland International Film Festival 2005, bréf þess efnis að sýning á mynd Svíans Lucas Moodysons Ett hål i mitt hjärta (Gat í hjarta mínu) sé leyfð með mjög ströngum skilyrðum.

Mælist Kvikmyndaeftirlit til þess að myndin verði einvörðungu sýnd í tilefni Kvikmyndahátíðar og þess sérstaklega gætt í þessu tilviki að börn eigi ekki aðgang að myndinni. Þá er mælst til þess að sérstakur starfsmaður gæti aðgangs að myndinni. Ennfremur bendir Kvikmyndaeftirlit á það að sýningar á myndinni gætu varðað við 210. grein hegningarlaga um birtingu klámefnis og gætu sýnendur átt von á kæru á þeim grundvelli.

Ísleifur segir aðstandendur kvikmyndahátíðarinnar vissulega munu virða tilmæli Kvikmyndaeftirlitsins, enda sé alls ekki ætlunin að myndin standi viðkvæmum sálum til boða. "Ég er fegnastur því að myndin fer í sýningu á morgun og fólk fær þá að draga eigin ályktanir," segir Ísleifur. "Það hefði verið mjög óskemmtilegt ef Íslendingum hefði ekki verið leyft að sjá þessa mynd og gera upp sinn eigin hug. Þetta er einn virtasti leikstjóri samtímans og þarna er hann bara að tjá sig um eitthvert ástand í nútímasamfélagi sem honum finnst ekki mjög gæfulegt. Þetta er auðvitað ekki þægilegt en honum finnst hann þurfa að fara þessa leið, að gera mynd sem fólki finnst óþægilegt að horfa á."

Kvikmyndahúsagestir í Svíþjóð hafa gengið út af sýningum myndarinnar sem frumsýnd var þar í landi 17. september.