Áform borgaryfirvalda um að koma Essó-bensínstöð fyrir á reitnum við Umferðarmiðstöðina í Reykjavík, koma þeim, sem annast hafa skipulagningu nýs húsnæðis fyrir Landspítala - háskólasjúkrahús á Hringbrautarsvæðinu, nokkuð á óvart, að sögn Davíðs Á. Gunnarssonar, ráðuneytisstjóra í heilbrigðis- og tryggingamálaráðuneytinu.

Stjórnendur LSH eru, skv. heimildum Morgunblaðsins, ekki allir sáttir við að Olíufélagið hf. fái að reisa bensínstöð á umræddum reit. Á sama svæði sé gert ráð fyrir nýbyggingu spítalans. Ekki sé heppilegt að hafa bensínstöð svo nálægt nýja spítalanum.

Þegar Davíð Á. Gunnarsson og Jóhannes M. Gunnarsson, forstjóri LSH, voru spurðir út í þetta mál í gær, vísuðu þeir á samkomulag sem Jón Kristjánsson, heilbrigðisráðherra og þáverandi borgarstjóri, Þórólfur Árnason, undirrituðu í apríl 2004. Í því er m.a. kveðið á um að borgin úthluti LSH og stofnunum Háskóla Íslands, sem tilheyra spítalanum, samtals 23 þúsund fermetra svæði, á umræddum Umferðarmiðstöðvarreit.

"Auk þess samþykkja samningsaðilar að borginni sé heimilt að úthluta allt að 7.000 fm til uppbyggingar miðbæjarstarfsemi í samræmi við fyrirhugað deiliskipulag svæðisins," segir í samkomulaginu. Þar segir einnig að fjögurra manna samvinnunefnd Reykjavíkurborgar, LSH, HÍ og eigenda Umferðarmiðstöðvar Íslands skuli vinna sameiginlega að deiliskipulagstillögu svæðisins.

Jóhannes segist ekki hafa fengið neinar formlegar upplýsingar um að til standi að breyta þessu samkomulagi milli ríkis og borgar. "Ég trúi því ekki fyrr en ég tek á því að það verði gerð á því breyting."

Samþykkt í borgarráði

Samtals var Umferðarmiðstöðvarreiturinn 30 þúsund fermetrar þegar samkomulagið var undirritað. Að sögn Helgu Bragadóttur, skipulagsfulltrúa Reykjavíkurborgar, hefur sex þúsund fermetrum verið bætt við reitinn síðan þá, vegna flutnings Hringbrautar.

Steinunn Valdís Óskarsdóttir borgarstjóri segir að borgaryfirvöld hafi skrifað undir samkomulag við Olíufélagið hf. sl. haust um að unnið skyldi að því að koma bensínstöð félagsins fyrir á Umferðarmiðstöðvarreitnum, í ljósi þess að það myndi missa bensínstöð við Faxaskálann í Reykjavík, vegna ráðstefnu- og tónlistarhússins, sem þar á að rísa.

Í því samkomulagi er gert ráð fyrir því að Olíufélagið fái 4000 fermetra svæði á umræddum reit. Steinunn segir að samkomulagið hafi á sama tíma verið lagt fram og samþykkt í borgarráði.

"Það er sameiginlegt hagsmunamál ríkis og borgar að koma þessari bensínstöð fyrir á öðrum stað svo ráðstefnu- og tónlistarhús megi rísa," segir hún.

Steinunn bendir á að Umferðarmiðstöðvarreiturinn sé mjög stór. "Hluti reitsins er ætlaður spítalanum en hluti hans var hugsaður undir miðbæjarstarfsemi. Borgaryfirvöld eiga ráðstöfunarrétt yfir þeim hluta." Hún tekur fram að síðustu að unnið sé að málinu í samráði við heilbrigðisyfirvöld.