Ólafur F. Magnússon, borgarfulltrúi F-lista, lagði fram tillögu á fundi borgarstjórnar í gær þess efnis að borgarstjórn Reykjavíkur samþykkti að ekki yrði heimilað að rífa 19. aldar hús á Laugavegi, milli Skólavörðustígs og Smiðjustígs. Þá verði heimildir til niðurrifs húsanna nr. 4, 5, 6 og 11 við Laugaveg dregnar til baka. Hann sagði að ef þessi hús yrðu rifin myndi það eyðileggja 19. aldar götumynd Laugavegarins en Ólafur hefur lagt mikla áherslu á verndun elstu húsanna við götuna sem eru meðal þeirra sem borgaryfirvöld hafa áform um að rífa.

Ólafur rakti stuttlega sögu húsanna fjögurra sem hann nefndi í tillögu sinni. Þar kom fram að húsin voru byggð á árunum 1868 til 1890 og væru meðal elstu bygginga í Reykjavík. Hann benti á að þessi fjögur hús skipuðu auk þess veigamikinn sess í byggingarsögu borgarinnar og geymdu merka sögu. "Sumum þeirra hefur verið breytt í gegnum tíðina en reynslan sýnir að eftir að gömlu timburhúsin hafa verið gerð upp á viðeigandi hátt skipa þau stóran sess í hugum Reykvíkinga og fæstir vildu vera án þeirra," sagði Ólafur og bætti því við að hann væri mjög ósáttur við stöðu mála varðandi verndun gamalla húsa við Laugaveg og þá sérstaklega varðandi stöðu elstu húsanna við götuna.