Töluverður erill var hjá lögreglunni í Vestmannaeyjum um helgina enda söfnuðust á annað hundrað ungmenni saman við Hrafnakletta til að fagna próflokum. Samkoman fór nokkuð vel fram enda hafði lögreglan talsverðan viðbúnað á svæðinu. Áfengi var tekið af þeim sem ekki höfðu aldur til að neyta þess og kom fram hjá nokkrum þeirra ungmenna að foreldrar hefðu keypt áfengið fyrir þau. Einnig sögðu nokkur þeirra ungmenna sem vísað var heim að foreldrar þeirra hefðu leyft þeim að vera á samkomunni.

Að sögn Tryggva Kr. Ólafssonar lögreglumanns í Vestmannaeyjum er þetta ef til vill ekki meira vandamál hjá þeim en öðrum bæjarfélögum, en afskiptaleysi foreldra hafi gengið of langt á laugardaginn var. Það sé ábyrgðarleysi af foreldrum að kaupa áfengi handa börnum sínum því neysla áfengis auki líkur á frekari vímuefnaneyslu. Eini maðurinn sem hafi haft áhyggjur af velferð ungmennanna hafi verið Þorvaldur Víðisson, prestur. Félagsmálayfirvöld geti lítið gert í málunum sökum fjársveltis og það sé því kominn tími til að bæjaryfirvöld komi þeim til aðstoðar svo hægt sé að takast á við vandann, að sögn Tryggva.

Þorvaldur Víðisson, prestur í Vestmannaeyjum sagði að of mikið hafi verið af ungum krökkum undir Hrafnakletti á laugardagskvöldið eftir að útivistartíma lauk. Hann hafi saknað foreldra á svæðinu sem hafi verið alltof fáir. Það þurfi samstarf foreldra, lögreglu og félagsmálayfirvalda til að virða útivistartíma og sinna eftirliti með ungmennum í bænum.