Samkvæmt niðurstöðum rannsóknar Hagstofunnar á útgjöldum heimilanna á árunum 2001 til 2003 eru meðalneysluútgjöld heimilis á ári um 3,5 milljónir króna eða nálægt 300 þúsund krónum á mánuði. Meðalheimilið telur 2,62 einstaklinga samanborið við 2,68 einstaklinga í rannsókninni árin 2000-2002.

Í Hagtíðindum eru birtar ráðstöfunartekjur þeirra heimila, sem þátt tóku í rannsókninni. Samanburður er gerður við tekjur heimila í neyslukönnuninni árið 1995. Meðalráðstöfunartekjur heimilis hafa hækkað um 71% á þessum tíma eða jafnmikið og meðalatvinnutekjur á mann en launavísitala hefur hækkað um 72% á sama tímabili og vísitala neysluverðs um 31,2%. Ráðstöfunartekjur á mann hafa hins vegar hækkað um 82% frá 1995 til 2003.

Samanburður á hæstu og lægstu tekjuhópunum sýnir að í þeim fjórðungi, þar sem tekjur eru hæstar voru útgjöld á mann 21% hærri en í þeim fjórðungi þar sem tekjurnar voru lægstar en tekjurnar 118% hærri. Niðurstöður eru einnig birtar eftir heildarútgjöldum, skipt í fjóra hópa. Þau heimili sem mest útgjöld hafa eyða 135% meira en þau sem minnstu eyða en tekjur þeirra eru 34% hærri.

Hagtíðindi