Hreiðar Már Sigurðsson, forstjóri Kaupþings banka, segist ekki geta tjáð sig um viðskipti bankans við Baug vegna fjárfestingarfélagsins A-Holding S.A. sem stofnað var til að kaupa hlutafé í Arcadia. Hann segir að starfsmenn bankans megi ekki tjá sig um einstök viðskipti.

Fjárfestingarfélagið A-Holding var stofnað árið 2001 til að fjárfesta í Arcadia. Stofnhluthafar voru Gaumur, Baugur, Kaupþing og Íslandsbanki. Í bréfi Jóns Ásgeirs Jóhannessonar til ríkislögreglustjóra segir að eitt af rannsóknarefnum ríkislögreglustjóra lúti að meintum fjárdrætti upp á 95 milljónir sem greiddar voru félaginu FBA-Holding S.A. Þetta segir Jón Ásgeir að sé greiðsla til Gaums vegna kaupa á hlut Gaums í A-Holding.

Fengu sérstaka þóknun
Í bréfi Jóns Ásgeirs segir að samið hafi verið um að Baugur keypti hina hluthafana út á ákveðnum tímapunkti og á fyrirfram ákveðnu verði. Þegar gengi hlutabréfa Arcadia fór hækkandi hafi Baugur hafið viðræður við forstjóra Arcadia um kaup á Topshop-hluta félagsins. Í þeim tilgangi hafi Baugur viljað kaupa út hluthafana í A-Holding fyrr og á verulega lægra verði en þeir áttu rétt á. Bæði Kaupþing og Íslandsbanki hafi fengið sérstaka þóknun fyrir að falla frá betri rétti sínum en þóknun Gaums verið hlutfallslega lægri en bankanna. Jón Ásgeir segir að Baugur hafi sparað 500 milljónir með þessu móti og vísar í ársskýrslu Baugs máli sínu til stuðnings. Vegna þessara viðskipta hafi Gaumur fengið 320 milljón krónum minna í sinn hlut en um var samið.

Bjarni Ármannsson, forstjóri Íslandsbanka, hefur áður neitað að tjá sig um þessi viðskipti og vísar til sömu reglna og Hreiðar Már.