Tekið verður upp eftirlit með notkun sérmerktra bílastæða fyrir hreyfihamlaða á opinberum bílastæðum og einkalóðum á Akureyri frá og með 26. ágúst. Eftir atvikum verður lagt stöðvunarbrotagjald á bifreiðar sem leggja heimildarlaust í bílastæði fyrir hreyfihamlaða, að því er fram kemur í fréttatilkynningu frá Akureyrarbæ.

Nokkuð hefur verið um að bílastæði hreyfihamlaðra á lóðum verslana og stofnana séu notuð af þeim sem ekki hafa leyfi til þess. Það eru grundvallarréttindi að komast leiðar sinnar, jafnt fyrir hreyfihamlaða sem aðra, og það veldur hreyfihömluðum miklum vandræðum ef þeir hafa ekki aðgang að þeim bílastæðum sem eru ætluð þeim.

Þeir sem ekki hafa sýnilegt P-skírteini hreyfihamlaðra í bíl sínum mega ekki nota stæðin. Þetta á við allan sólarhringinn og við lestun og losun og þó að aðeins sé lagt eða stöðvað í stutta stund.

Fyrst um sinn verða þeir sem leggja heimildarlaust í sérmerkt bílastæði hreyfihamlaðra aðvaraðir með miða sem settur verður undir þurrkublað viðkomandi bifreiðar, en í framhaldi af því verður lagt á stöðvunarbrotagjald að upphæð kr. 2.500 í slíkum tilvikum.