Frímerki, sem Íslandspóstur gaf út 26. maí s.l., hefur hlotið fyrstu verðlaun sem fallegasta og best hannaða Evrópufrímerki ársins 2005. Slík verðlaun eru jafnan veitt á aðalfundi PostEurop, samtaka 43 póststjórna í Evrópu, og greiða fulltrúar aðildarfélaganna atkvæði um útnefningu þeirra.

Aðalfundinum í ár lauk í Portúgal nú um helgina og veitti Ingimundur Sigurpálsson, forstjóri Íslandspósts, verðlaununum viðtöku.

Efni íslenska frímerkisins er fiskmeti, en matargerðarlist var sameiginlegt myndefni Evrópufrímerkjanna í ár. Íslandspóstur segir, að snið frímerkisins sé óvenjulegt því það er hringlaga og er gengið út frá matardisk sem forsendu hönnunarinnar. Hany Hadaya hjá H2 hönnun, hannaði frímerkið sem hefur verðgildið 70 kr.

Íslandspóstur segir, að nær allar póststjórnir í Evrópu gefi árlega út frímerki með sameiginlegu myndefni sem er ákveðið af PostEurop og eigi þau að vera tákn fyrir samvinnu Evrópulanda á sviði póstmála og auka skilning á sameiginlegri sögu og menningu þjóðanna sem að þeim standa. Þessi frímerki séu auðkennd með árituninni Europa. Árið 2006 verði haldið upp á hálfrar aldar afmæli fyrstu Evrópufrímerkjanna og muni Íslandspóstur minnast 50 ára samvinnu á sviði frímerkjaútgáfu í Evrópu með útgáfu smáarkar. Löndin sex sem undirrituðu Rómarsáttmálann, stofnsáttmála Evrópusambandsins, gáfu út fyrstu Evrópufrímerkin 15. september 1956. Þessi lönd voru Belgía, Frakkland, Holland, Ítalía, Lúxemborg og Vestur-Þýskaland.

Íslandspóstur hlaut í ágúst fyrstu verðlaun í alþjóðlegri samkeppni um þýðingarmestu frímerkjaútgáfur í Evrópu á síðasta ári. Samkeppnin var haldin á vegum Riccione-sýningarinnar á Ítalíu en póstrekendur í öllum Evrópulöndum, sem eru meðlimir í Alþjóðapóstsambandinu, sendu frímerki í keppnina.