Öflun ehf, sem er með umboð fyrir Apple á Íslandi, hefur keypt 37,8% hlut í norska fyrirtækinu Office Line ASA, sem skráð er í kauphöllinni í Ósló. Office Line rekur sjö verslanir og þrettán söluskrifstofur í Noregi, Danmörku, Svíþjóð og Finnlandi, og er stærsti seljandi Apple-vara á Norðurlöndum, einkum til fyrirtækja og stofnana.

Bjarni Ákason, framkvæmdastjóri Öflunar ehf, segir fyrirtækið hafa byrjað að kíkja á markaðinn á Norðurlöndunum fyrir tveimur árum og í kjölfarið hafi fyrirtækið opnað tvær Apple-verslanir í Kaupmannahöfn og nú fyrir mánuði síðan eina í Stokkhólmi. Við þessa könnun á markaði Norðurlandanna hafi fyrirtækið uppgötvað fyrirtækið Office Line ASA, sem sé skráð á norskan hlutabréfamarkað en hafi verið mjög vanmetið, markaðsverðið mjög lágt.

„Það varð úr að í stað þess að opna fleiri verslanir á þessum stöðum ákváðum við að kaupa í þeim og læra á markaðinn í Noregi og Finnlandi,“ sagði Bjarni í viðtali við Fréttavef Morgunblaðsins síðdegis í dag. Rekstur verslana Office Line breytist ekki við kaupin heldur nái Öflun meirihluta í stjórn fyrirtækisins. Það sé með markaðsráðandi stöðu í sölu á Apple-vörum, með 40% markaðshlutdeild í Noregi og 30% í Finnlandi og hafi verið rekið með góðum hagnaði.

„Þeir [í Office Line] eru ólíkir okkur að því leyti að við viljum einbeitum okkur að neytendum með því að opna verslanir á besta stað í hverjum bæ en þeir eru meira í fyrirtækjaþjónustu,“ segir Bjarni. Með þessum kaupum sé Öflun í raun ekki lengur lítið fyrirtæki með veltu upp á 200 milljónir en verði með kaupunum komið með veltu upp u.þ.b. þrjá milljarða.

Áætluð velta Office Line á þessu ári er um 490 milljónir norskra króna, rúmlega 4,5 milljarðar króna, og eru starfsmenn félagsins 140. Með kaupum Öflunar á ráðandi hlut í Office Line styrkir félagið sig verulega í samkeppni við aðra seljendur Apple á Norðurlöndum. Hækkaði gengi hlutabréfa í Office Line um 30% í dag eftir að kaupin spurðust út.