Flemming Hansen, samgönguráðherra Danmerkur, hefur staðfest í svari við fyrirspurn á danska þinginu, að flugvél, sem talið er að bandaríska leyniþjónustan CIA hafi notað til að flytja fanga, hafi þann 3. október farið frá Reykjavíkurflugvelli á Íslandi um danska lofthelgi til Búdapest í Ungverjalandi. Vélin var með skrásetningarnúmerið N168D.

Danska utanríkisráðuneytið sendi bandarískum stjórnvöldum í ágúst mótmæli vegna málsins, en talið er að flugvélar á vegum CIA, sem farið hafi um danska lofthelgi, séu notaðar til að ferja meinta hryðjuverkamenn um heiminn, m.a. til landa þar sem vitað er að mun harkalegri aðferðum er beitt við yfirheyrslur en leyfilegt er samkvæmt bandarískum lögum.

Danska ríkisútvarpið segir í dag, að flugvélar frá leppfyrirtækjum CIA, sem notaðar séu til fangaflutninga, hafi oft flogið gegnum danska lofthelgi og í að minnsta kosti eitt skipti lent í Kaupmannahöfn. Dönsk stjórnvöld hafa aldrei viðurkennt þetta opinberlega en Per Stig Møller, utanríkisráðherra, upplýsti þann 22. ágúst, eftir að hafa verið þaulspurður í danska þinginu um fangaflutningana, að utanríkisráðuneytið hafi gert bandarískum stjórnvöldum grein fyrir því, að dönsk stjórnvöld vilji ekki að dönsk lofthelgi sé notuð til að ná fram markmiðum, sem ekki samræmast alþjóðlegum sáttmálum.

Danska ríkisútvarpið segir, að flugvélin sem fór frá Íslandi 10. október sé í eigu Devon Holding & Leasing, en það fyrirtæki er talið eitt af sjö leppfyrirtækjum, sem CIA notar í fangaflutningunum. Að sögn bandaríska blaðsins New York Times á CIA að minnsta kosti 26 flugvélar, þar af hafa 10 verið keyptar frá árinu 2001.

Frank Aaen, þingmaður danska Einingarflokksins, segir að utanríkisráðherrann verði að koma á fund utanríkismálanefndar danska þingsins til að gefa skýringar á þessu máli. Vill Aeen einnig fá að vita, hvers vegna flugvél frá Path Corporation, sem einnig er leppfyrirtæki CIA, var í 23 tíma á Kastrupflugvelli í Kaupmannahöfn í mars.