Geir Jón Þórisson, yfirlögregluþjónn hjá lögreglunni í Reykjavík, segir í samtali við Fréttavef Morgunblaðsins að konunni sem reyndi að ræna leigubílsstjóra með loftbyssu í gærkvöldi hafi verið sleppt úr haldi eftir skýrslutöku í morgun. Leigubílsstjóranum var sleppt úr haldi í gærkvöldi eftir skýrslutöku, en hann var handtekinn eftir að hann brást ókvæða við þegar sérsveit lögreglunnar handtók konuna í gærkvöldi.

Geir Jón segir að tilkynning hafi borist lögreglunni kl. 19.47 frá Hreyfli, en óskað var eftir skjótri aðstoð vegna leigubílsstjóra sem væri í vandræðum með farþega við hús Orkuveitunnar á Bæjarhálsi. Geir Jón segir að Hreyfill hafi haft samband öðru sinni fimm mínútum síðar þar sem greint sé frá því að leigubílsstjórinn eigi vandræðum við gamla Orkuveituhúsið við Suðurlandsbraut.

Mínútu síðar var fyrsti lögreglubíll mættur á vettvang og klukkan 20.16 var allt afstaðið að sögn Geirs Jóns.

Geir Jón segir að leigubílstjórinn hafi brugðist illa við afskiptum lögreglum þegar sérsveitarmenn handtóku konuna í gærkvöldi. Hann var því einnig færður á lögreglustöðina í járnum en honum var sleppt eftir skýrslutöku í gærkvöldi. „Lögreglan vinnur eftir ákveðnum verklagsreglum þegar svona tilkynningar berast og almenningur er nú ekki vanur að standa frammi fyrir því. Hann skildi það ekki og það endaði með því að það þurfti að fjarlæga hann af vettvangi,“ segir Geir Jón.

Aðspurður um hvort einhverjar kærur hafi verið lagðar fram segir Geir Jón að ekkert liggi fyrir í þeim efnum. „Það er lögfræðinga þeirra að líta á það,“ segir hann.

Jafnframt segir Geir Jón að konan hafi hvorki verið undir áhrifum áfengis né fíkniefna.