Skuggabörn er mynd þeirra Þórhalls Gunnarssonar og Lýðs Árnasonar en í henni er Reyni Traustasyni, blaðamanni, fylgt eftir. Reynir hefur verið að rannsaka undirheima Reykjavíkur undanfarin tvö ár og í myndinni kemur meðal annars við sögu ungur drengur, sem var myrtur eftir að tökum myndarinnar lauk. Það er móðir hins látna sem leggur fram lögbannskröfuna. Til stendur að forsýna myndina í Regnboganum í kvöld og sýna hana í Sjónvarpinu næstkomandi þriðjudag en af hvorugri sýningunni verður, fallist sýslumaður á að setja lögbann á sýningu hennar.

Hilmar Gunnlaugsson, lögfræðingur þeirra Þórhalls og Lýðs, segir að lögbannskröfunni verði andmælt fyrir sýslumanni af þeirra hálfu. Að sögn Hilmars hefur verið komið til móts við hana með því að klippa út myndskeið af látnum syni konunnar og komi hann nú hvergi fyrir í myndinni. Engu að síður sé því haldið fram að um brot á friðhelgi einkalífs sé að ræða.

"Að mati umbjóðanda míns er svo ekki," segir Hilmar.