Kallað var eftir svörum frá iðnaðarráðherra á Alþingi í dag um það hvort stjórnvöld ætluðu að veita auknu fjármagni til Byggðastofnunar til að tryggja starfsemi hennar áfram. Fram hefur komið, að stofnunin hefur hætt útlánum tímabundið vegna þess að eigið fé hennar er komið að viðmiðunarmörkum sem Fjármálaeftirlitið hefur sett.

Anna Kristín Gunnarsdóttir, þingmaður Samfylkingar, tók málefni Byggðastofnunar fyrir í fyrirspurnartíma í dag, og sagði að Valgerður Sverrisdóttir, iðnaðarráðherra, hefði í síðustu viku svarað á Alþingi fyrirspurn um úttekt á Byggðastofnun. Þar hefði hefði komið fram, að niðurstöður úttektarinnar væri að finna í iðnaðarráðuneytinu og aðgengilegar þingmönnum þar. Sagðist Anna Kristín í kjölfarið hafa á fimmtudag og föstudag reynt að nálgast úttektina en án árangurs. Ritari ráðherra hefði lofað því eftir hádegi á föstudag að gögnin yrðu send í tölvupósti en í þeim pósti hefði síðan verið allt önnur skýrsla.

Anna Kristín sagði að fjárlagagerð fyrir næsta ár væri á lokastigi á Alþingi og einnig þyrfti að sækja um meira fjármagn til stofnunarinnar á þessu ári. Spurði Anna Kristín hvort ráðherra ætlaði að leggja það til nú við fjárlagagerðina, að Byggðastofnun fengi aukið fjármagn.

Valgerður sagðist ekki skilja hvers vegna verið væri að ræða um mistök ritara síns á Alþingi og sagði að umrædd gögn yrðu send. Hún sagði rétt, að Byggðastofnun ætti í erfiðleikum vegna þess að eigið fé stofnunarinnar væri komið niður fyrir lögleg mörk og við því þyrfti að bregðast. Einnig þyrfti að fara yfir það hvernig starfsemi Byggðastofnunar ætti að vera til framtíðar varðandi lánastarfsemi en samkvæmt lögum ætti sú starfsemi að standa undir sér. Nefnd er að störfum sem skipuð var í kjölfar þess að fyrrgreind skýrsla kom fram. Þá sagði Valgerður að nóvembermánuður væri ekki liðinn og enn væri tími til að finna lausn á fjárhagsvanda Byggðastofnunar. Sagðist hún vilja hugsa til framtíðar og sjá til þess að stofnuninni verði séð fyrir tilhlýðilegum verkefnum til frambúðar.

Anna Kristín sagði það ekki rétt að góður tími væri til stefnu því Byggðastofnun væri þegar orðin óstarfhæf vegna fjárskorts. Spurði hún hvers vegna það væri dregið fram yfir afgreiðslu fjárlaga að taka á vanda Byggðastofnunar en það gæti orðið til þess að stofnunin yrði óstarfhæf það sem eftir er þessu ári og fram á það næsta.

Valgerður svaraði ekki frekar. Þegar fyrirspurnartímanum lauk tók Össur Skarphéðinsson um þykkjuna fyrir Önnu Kristínu og gagnrýndi Valgerði fyrir að svara ekki spurningum þingmannsins eins og þingsköp mæltu fyrir. Sagði Össur, að ekki væri hægt að gera kröfur til ráðherra um að þeir svöruðu einhverju sem þeir vissu ekki og ansi oft væri það þannig með ríkisstjórnina, að hún vissi ekki hvað hún vildi og vildi stundum það sem hún ekki gerði. Hins vegar hefði verið sjálfsögð kurteisi af ráðherra að koma upp og svara spurningunni.

Valgerður sagði greinilegt, að mikill titringur væri orðinn í herbúðum Samfylkingarmanna þegar Össur kæmi upp til að ítreka spurningu frá öðrum þingmanni flokksins sem hún hefði þegar svarað á sinn hátt; þannig, að nóvembermánuður væri ekki að lokum kominn, og það gæfist tími til að fara yfir málið milli stjórnarflokkanna. Verið gæti að þingmaðurinn væri óánægður með svarið en við því væri ekkert að gera.

Össur sagðist hafa fullan skilning á því að það kynnu að vera einhverskonar átök milli stjórnarflokkanna í ákveðnum málum, svo sem um Byggðastofnun. En það væru ákveðnar grundvallarreglur sem giltu í samskiptum stjórnar og stjórnarandstöðu og ráðherrar yrðu að svara ef bornar væru fram málefnalegar spurningar. Því miður væri iðnaðar- og viðskiptaráðherra ekki beinlínis að greiða fyrir þingstörfum rétt fyrir jólin og ganga yrði eftir frekari svörum um málið á Alþingi á morgun.