Valgerður Sverrisdóttir iðnaðarráðherra sagði á Alþingi í gær að Byggðastofnun ætti við vanda að etja en tók fram að tíminn væri nægur til að finna lausn á honum. Þetta kom fram í svari hennar við fyrirspurn Önnu Kristínar Gunnarsdóttur, þingmanns Samfylkingarinnar.

Anna Kristín vísaði í morgunfréttir og sagði að samkvæmt þeim hefði Byggðastofnun hætt útlánum þar sem hún væri komin undir átta prósenta eiginfjárhlutfall. Þingmaðurinn sagði að iðnaðarráðherra hefði ekki farið fram á meiri fjárveitingar til Byggðastofnunar í þeirri fjárlagavinnu sem nú ætti sér stað á Alþingi og spurði hvað ráðherra ætlaðist fyrir með stofnuninni.

Valgerður sagði það rétt að eigið fé stofnunarinnar væri komið niður fyrir lögleg mörk. Við því þyrfti að bregðast. Einnig þyrfti að fara yfir það hvernig starfsemi stofnunarinnar ætti að vera til framtíðar í ljósi þess að lánaumhverfið hefði breyst. „Samkvæmt lögum á lánastarfsemi stofnunarinnar að standa undir sér og vera sjálfbær en miðað við þessa breyttu stöðu er ekki útséð um það hvort það geti orðið til framtíðar. Þess vegna þarf að skoða þetta mál mjög gaumgæfilega.“

Anna Kristín spurði aftur eftir þessi svör hvort ráðherra hygðist fara fram á aukafjárveitingu til Byggðastofnunar, en ráðherra svaraði því til að nóvembermánuður væri ekki allur: „Það er þó nokkur tími til stefnu til þess að finna lausn á þeim vanda sem háttvirtur þingmaður talar hér um. Ég tek undir með henni hvað það varðar að stofnunin er í vanda. Við þurfum að finna lausn á því máli og ég vil gjarnan hugsa til framtíðar.“ Valgerður sagði að stofnunin annaðist mikilvæg verkefni og vildi að svo yrði áfram.