Sturla Böðvarsson, samgönguráðherra og 1. þingmaður Norðvesturkjördæmis, hefur svarað bréfi þriggja þingmanna stjórnarandstöðunnar, sem sent var í gær. Segir Sturla að engin sérstök eða aðkallandi ástæða til þess að þingmenn kjördæmisins verði kallaðir til fundar vegna póstþjónustu við Ísafjarðardjúp því samkvæmt upplýsingum, sem ráðuneytið hafi aflað sér frá Íslandspósti sé ekki um að ræða grundvallar breytingar á þjónustunni.

Í bréfi þingmannanna þriggja segir m.a: „Vakin er athygli á því að Íslandspóstur hf hefur boðað grundvallarbreytingar á póstþjónustu við Ísafjarðardjúp, og ef til vill víðar á Vestfjörðum, sem gert er ráð fyrir að taki gildi frá og með næstu áramótum."

Sturla segir í svari sínu, að málefni póstdreifingar í Ísafjarðardjúpi séu í viðeigandi farvegi á vettvangi Íslandspósts. Samkvæmt upplýsingum sem ráðuneytið hefur aflað sér frá forstjóra Íslandspósts er ekki um að ræða grundvallar breytingar á póstþjónustu.

„Því er engin sérstök eða aðkallandi ástæða til þess að þingmenn verði kallaðir til fundar. Þess skal getið að samgönguráðuneytið hefur haft milligöngu um að forsvarsmenn Íslandspósts og sveitarstjórinn í Súðavíkurhreppi eigi viðræður um fyrirkomulag póstþjónustunnar í þeim tilgangi að tryggja sem best þjónustu við íbúa við Ísafjarðardjúp með samstarfi Íslandspóst og þeirra aðila sem eðlilegt er að komi að því að tryggja sem best þjónustu í þessu víðfeðma sveitarfélagi. Jafnframt hefur ráðuneytið af þessu tilefni átt viðræður við forstjóra Póst og fjarskiptastofnunar vegna þeirra reglna sem í gildi eru um póstþjónustu í dreifbýli og stofnunin hefur eftirlit með. Samgönguráðuneytið mun fylgjast með framvindu mála við Ísafjarðardjúp og eiga viðræður við forsvarsmenn sveitarfélagsins í þeim tilgangi að stuðla að farsælli lausn mála," segir í svari Sturlu.