Talið er að bruninn í flugeldasölunni í Hveragerði í gær hafi kviknað þegar neisti hljóp úr heftibyssu sem notuð var við að festa saman þræði sem eru hluti af flugeldasýningu sem fara átti fram í gærkvöldi. Hugsanlegt er talið að stöðurafmagn hafi hlaðist upp í byssunni. „Málið er í rannsókn og það á eftir að taka nánari skýrslur af mönnum,” sagði Svanur Kristinsson varðstjóri lögreglunnar á Selfossi.

„Það reis upp mikið sveppaský yfir bænum, það sást víða að á Suðurlandi,” sagði Svanur.

Þetta munu vera hefðbundin vinnubrögð við að setja saman slíkar flugeldasýningar og telst það mesta mildi að ekki fór verr. Maðurinn var einn við að setja sýninguna saman og náði að forða sér út. „Hann var að ganga frá tívolíbombum í viðarkassa til að flytja á skotstað og festi sprengiþræðina að lokum við kassann þegar neistinn hleypti öllu af stað,” sagði Ólafur Óskarsson varaformaður Hjálparsveitar skáta í Hveragerði.

Í öðru herbergi var flugeldasalan í gangi og voru þar um 10 til 15 manns sem náðu að forða sér út. Einn maður snérist á ökkla við að forða börnum sínum út úr húsinu.

„Herbergið þar sem bruninn hófst er vel varið af eldveggjum og stálhurðum en bomburnar fóru að skjótast upp í gegnum þakið og þannig kviknaði í húsinu,” sagði Ólafur. Flugeldalagerinn sem var í öðrum hluta hússins brann ekki en er ónýtur eftir vatn og froðu. Hús sveitarinnar er talið ónýtt og skemmdust húsin sitt hvoru megin við það eitthvað. Sveitin missti allan sinn fjalla- og björgunarbúnað, þar á meðal fjóra snjósleða og tengikerrur aftan í þá, verkfæri og fleira. Þá skemmdist svæðisstjórnarbíll sem er sameiginleg eign hjálparsveitanna á Suðurlandi en hann stóð nærri húsinu og hljóp eldur í hluta hans.