Ármann Kr. Ólafsson, aðstoðarmaður fjármálaráðherra, segir að verið sé að taka vörugjöld í heild sinni til athugunar í ráðuneytinu. Fram kemur í fréttaskýringu um tæknimál á Fréttavef Morgunblaðsins, að Apple fyrirtækið á Íslandi hyggst fara í mál við íslenska ríkið vegna þeirra tolla sem eru lagðir á iPod mp3-spilara hérlendis.

Mp3-spilarar eru settir í sama vörugjaldsflokk og geislaspilarar og önnur afspilunartæki þó að tæknin sem notast er við sé önnur. Ef Mp3 spilarar væru flokkaðir sem tölvur og tölvutengdur varningur væri gjaldið lægra.

Ármann sagði að það þyrfti að fara varlega í þetta mál. „Ef þú breytir einu, eins og í þessu tilfelli iPod-vélum þá þarf að passa að skekkja ekki myndina enn frekar. Þessi tækni er t.d. til staðar í farsímum og í þeim tilvikum eru spilararnir ekki með vörugjaldi og það má færa rök fyrir því að fólk noti afspilunarmöguleikann í þeim símum meira en það notar símann sem síma. Tollalögin segja að álagningin skuli fara eftir þeirri meginnotkun sem tækið er notað í.”

Hitt sjónarmiðið sem ríkissjóður þarf að athuga að ef gjöldin eru of há þá er hætta á að verslunin færist til útlanda sem virðist vera tilfellið með iPod-vélarnar. „Já, ríkissjóður myndi engu tapa með því að lækka gjöldin ef þú horfir á þetta dæmi einangrað því að verslunin myndi flytjast heim,” sagði Ármann.

Fjallað er um ýmsar raftækjanýjungar í fréttaskýringu á Fréttavef Morgunblaðsins, sem hægt er að lesta með því að smella hér.