Bílaeign í Reykjavík nálgast mettun og í samanburði við aðrar borgir á Norðurlöndunum er Reykjavík í sérflokki. 33% aukning varð á bílaeign í borginni á árunum 1995-2004 og samkvæmt ferðavenjukönnun frá árinu 2002 eru um 76% af öllum ferðum íbúa höfuðborgarsvæðisins farin á einkabílum. Hlutur Strætó bs. er rúm 4% og um 19% ferða eru farin hjólandi eða gangandi. Ferðir til og frá vinnu eru flestar farnar þegar mest álag er á gatnakerfinu en rúm 88% þeirra eru farin á einkabílum. Þetta er meðal þess sem fram kemur í nýrri skýrslu um samgönguskipulag í Reykjavík.

Af evrópskum borgum sem notaðar voru sem viðmiðunarborgir við greiningu á stöðu og stefnu í samgöngumálum borgarinnar var hlutfall ferða sem farnar voru gangandi, hjólandi eða með almenningssamgöngum lægst í Reykjavík. Í skýrslunni kemur fram að ferðamátaval borgarbúa komi ekki á óvart, meðal annars vegna fjölda einkabíla, hárrar þjónustugráðu stofnbrauta, þjónustu almenningssamgangna og fjölda gjaldfrjálsra bílastæða. Fargjöld Strætó bs. eru í hærri kantinum samkvæmt skýrslunni en þó alls ekki óeðlilega há.

Hæstu álagstoppar í borginni standa í um 10-20 mínútur þegar ökumenn fara til vinnu fyrir kl. 8 og 9 á morgnana. Í skýrslunni eru meðal annars gerðar tillögur um hvernig dreifa má umferðarálagi og bæta nýtingu samgöngukerfa í borginni. | 6